新紮師兄 艷照大晒冷
新紮師兄 艷照大晒冷
《警員網誌私相簿》Xanga內上載的其中一張相片，一批新紮師兄在學堂內僅穿上半身制服合照，被指涉嫌違反警察通例。
警花阿旦上月在網誌上載自拍制服艷照令警隊尷尬後，警隊計劃今年內推出使用社交網絡指引，然而類似事件再爆一宗。一名於 07年畢業的「新紮師兄」製作網誌，原意供同學交流互勉，最後卻成為各人吐苦水之地，不但將警隊內部偷懶、苟且等文化公諸於世，更揭露不少涉嫌違紀行為，包括濫權將疑犯剝光豬，甚至因為「怕麻煩」而私下放走犯人等。警察員佐級協會主席黃程直指事件嚴重，必須徹查。記者：葉競科
涉事 Xanga網誌由一名花名「阿奶」的軍裝警員製作，供警察學院 07年某屆畢業的警員交流，上載了逾百張學堂生活照，一眾新紮師兄亦不時貼文訴說當差苦樂，到今年 6月仍有運作。綜觀他們當差四年多，心態積極樂觀者少，沮喪無奈者多，當中揭露不少警隊內部害群之馬的劣行。
另一張相片，一批新紮師兄在學堂房間內「玩剝褲」。
新紮師兄 艷照大晒冷
新紮師兄用「雨帽蓋」扮成貝雷帽搞鬼合照。
警員怨導師懶「學唔到嘢」
網誌內爆料最多、情緒最為負面的警員就是自稱駐守北角警署的「士多誠」。他在多篇貼文表示該區「 R得交關」（意指悠閒），而指導他工作的「雕陀」（即導師）又懶得過份，只能日日跟對方在「蛇竇」偷懶，埋怨「學唔到嘢」。
最令人震驚的，就是士多誠爆出師兄私下放走犯人的行徑。他透露，有次行「孖咇」處理一宗投訴，「發現現場嘅垃圾佬竟然係揸住雙程證打工，夠晒料……點知最後師兄決定係放佢走。」士多誠在文中大吐苦水：「因為佢（師兄）話呢啲 case『打包頭』（記錄犯人財物）係 sub unit（軍裝小隊）一手包辦，太麻煩，所以唔做，當無見過佢就算，古仔當然係叫我改……」他抱怨自己無機會實習，無意中卻踢爆同袍涉嫌妨礙司法公正。
網誌中另一個嚴重指控就是有警員涉嫌濫用職權，事件由駐守元朗的「阿奶」爆出。 07年 2月 5日，阿奶巡邏時截獲一名男子，經電台核實確知對方正被通緝。阿奶說：「呢條肥仔垃圾蟲冇交罰款，算佢唔好彩，咁俾我哋撞死咗！跟住佢都好合作上車返差館，返到去又要佢剝光豬搜身，有啲唔知點咁……不過呢啲 case只要有人嚟幫佢交罰款就可以放人。」
網誌還記下不少警員惹人詬病的行為，例如爭相觀賞偷拍裙底案女受害人的露底照等。部份新紮師兄對警隊顯得灰心，揚言「做得多冇人會話你叻仔，衰咗仲會一沉百踩」。有人更作打油詩諷刺長官「奉承上司笑淫淫，刁難下屬聲大大，不怕新紮師兄學歷高，只怕老前輩們耍花樣」。不過，有前輩警員亦在網誌激勵一眾新紮師兄切勿灰心。
員佐級協會主席：須徹查
警察員佐級協會主席黃程透露，自上月「制服艷照」事件後，警隊內部電郵已再次提議同袍不應作出有損警隊形象的行為。然而今次網誌內容，因提及有警員涉嫌作出私下放犯等行為，可能涉及妨礙司法公正，他認為有必要作出追查。警方發言人表示會作出跟進。
《新紮師兄心聲》爭睇美少女裙底照
新紮師兄 艷照大晒冷
Monday, February 19, 2007
大年初一。千祈唔好話大年初一冇乜嘢搞，我做 mp1（ 1號巡邏車）仲有嘢拉！就係有條鹹濕仔用手機，拍一個少女裙底，短裙仔、仲要係幾靚女、 16歲，兩個字……清純！仲要俾一個街外人見到，話俾條女聽先知，跟手捉住佢報警。記住，自己發現同人哋話佢知係有分別，自己發現係油雞（遊蕩），人哋話俾佢知就係公眾地方行為不檢 or破壞公眾體統，最緊要記住！所有人都蜂湧去睇嗰張相，我都有睇過，都係一個 pat，同有花白底！都冇乜特別啫，鹹濕仔最終 PG（認罪），交 CID。難忙年初一。
有委任證 通行無阻
新紮師兄 艷照大晒冷
Wednesday, January 31, 2007
今日好驚險。
喺一條村路突然俾警察截停咗我哋架車，原來佢以為我哋啱啱偷車……
於是叫我哋出示身份證同車牌，之後我拎緊之際俾佢哋睇到我張委任證，佢就話：「，原來夥計嚟㗎，早啲出聲嘛，我哋家做緊個行動，係捉人偷車呀！冇事㗎啦，你哋走啦！」
咁我哋就走啦，我仲以為俾佢知道咗我無牌駕駛呀，嚇到我死咁滯呀！
照顧犯人 口不對心
新紮師兄 艷照大晒冷
Thursday, February 22, 2007
有位大嬸神色慌張，好驚咁走埋嚟：「阿 Sir，前面有個黐線佬呀，見人就踢呀！」老遠見到有個同事加兩個市民同一個人「典」緊……當然二話不說，上去前面幫拖……四周圍已經企滿晒人圍觀，驟眼見到有四、五條友揸住部電話喺度唔知拍嘢定影相，呢個時候鏡頭之下點都要斯文啲，我就同佢講話「唔郁就冇事」，其實隻手就㩒到佢條腰實一實。喺呢件事，發現幾樣嘢：
1.平時真係要做吓運動練吓體能。
2.小心啲死人鏡頭……要聲東擊西，口就要講到好關心個犯問佢有冇事，但手腳拳頭就其實關照緊佢……
為交數 自己呃自己
新紮師兄 艷照大晒冷
Saturday, January 27, 2007
做咗兩個星期，自己就好似迷失咗方向……好似冇乜意思咁，家唔係告啲死車，就係搵啲阿姐（盤查），又或者行行企企……有時都覺得幾好笑，講就話唔使交數，但朝朝早都不停讀啲告票數字，呢啲就係功課，但天水圍有幾多車係真係值得我哋去告呀？唔值得但係又要告，又要喺 notebook度作佢點樣阻，真係連我自己都呃自己，好似好辛苦，收工又要寫低今日做過啲乜，有時要作出嚟，令到個數好睇啲，咁我真係見唔到可疑人，咁做出嚟有乜意思。唉，一個咁大嘅部門有啲咁唔文明嘅做法。
新紮師兄 艷照大晒冷
引用自：濫權將疑犯剝光豬 怕麻煩私下放黑工 新紮師兄網誌 大爆違紀行為
