桃姐 傻仔
桃姐 傻仔
有人惡搞《桃姐》海報，將主角換上范太同唐唐放上網。
電影《桃姐》揚威國際，喺威尼斯影展奪得大獎後，今個星期會在多倫多國際電影節公映，係電影節「特別推薦」電影之一。《桃姐》咁威水，特首高官即時發功抽水，令呢齣感性電影加插滑稽笑料。
海報交足貨
世事嘅嘢，往往戲如人生，老僕與少主感人故事令好多人動容，類似劇情，政壇亦有疑似情節。有人惡搞《桃姐》海報，將兩個主角分別換上范太同唐唐，事關范太近日幾乎日日開口挺唐，提醒佢說話要小心，做人要認真，對人要交心，對唐唐愛護有加、呵護備至嘅肉緊程度，絕對可以同桃姐媲美。
唐唐係貨真價實富家子弟，似足戲中少爺 Roger，由佢擔正做主角，不作他選，惡搞海報上有句話：「契媽話我呢，唔係傻，係單純！」戲名改為《傻仔》，貼切，可惜冇改埋英文戲名做 A Simple Guy，美中不足。
實情唐唐參選，唔止有范太沿途祝福，如果真係開拍《傻仔》，八方強烈要求改劇本，最少要加多一個主角，就係眾所周知嘅唐氏「家臣」林大輝，多年來佢七情上面、瞓晒身落足力支持唐唐，講護主，無人能及，隨時比桃姐更愛錫少爺仔，噚日更加開口叫唐唐盡快辭職，叫其他建制派人士唔好落場，如此忠心家丁，唐唐坐正嘅話，又點能夠少咗呢塊綠葉？
惡搞海報交足貨，寫明呢齣政治溫情大製作由 Henry Tang、 Rita Fan主演，至於 CY Leung則「無你份」，不過八方覺得家就斷言 CY無角色太武斷，事關佢做咗咁多功夫，要攞入場券應該無難度，何況天威難測，冇人知阿爺個劇本點寫，八方相信呢齣鉅製冇咁快高潮，姑勿論輸贏， CY肯定係最佳男主角，我話嘅。
桃姐 傻仔
引用自：《桃姐》范太版名叫《傻仔》
桃姐 傻仔 影片
影片：《桃姐》范太版名叫《傻仔》
